Eras Pastorèlas de Campan
Eras pastorèlas qu’an ua vielha istòria plan cavilhada puishque en 2008 que hestejèn eths 90 ans passats desempuish er’annada 1918.
En aqueth an de 1918, Yvòna Arène-Cuillé, qu’instituè eth grope deras Pastorèlas de Campan.
Desempuish 1935, Eras Pastorèlas que son membre fondator dera « Confederacion Nacionala deths Gropes Folklorics Francés ».
Tota gojata,Yvòna qu'èra anada dab Filadèlfa de Gerda entà cantar e dançar.
Mes dab er’ ajuda de sa mair e de sa pair que’s passegè pera vath de Campan e que collectè legendas, cants e danças au près deths vielhs deth Sarrat, dera Hòssa, deth Peyras, deths Cayres de Bi, deras Bulanettes, de Trassoet, de Pèirahitta, de Horsentut e deth Sarrat de Bon…
Qu’arretrobè tanben cotilhons, còhas e capulets ens solèrs deras maisons casalèras. Enas annadas 1900 eras hemnas vielhas qu’èran encòra vestidas de cotilhons hèits a casa sus eths telèrs. Tara missa que’s hicavan eth capulet sus era còha, mes a condar dera Guèrra de Catorze, permor que i avó hèra de veusas, non portèn mes que capulas e capulets negres e ‘ths arrois qu’estón plegats ens armaris.
Eths òmes, dab camisas de lin, pantelons de cadís o de cotil e vèstas tricotadas dab era lan burèla deras oelhas de casa, hielada peras hemnas, n’avèn pas tanpòc cambiat de vestit desempuish eth temps deth arrei Seset.
Yvòna que cerquè musicaires, flaütaires e violonaires e dab aquestes qu’aprenó a dançar e a cantar eras vielhas sonsainas aras gojatas e gojats dera vath de Campan.
Eras Pastorèlas qu’èran nascudas.
E ara que hèn Eras Pastorèlas ?
Eth temps qu’a passat, totun Eras Pastorèlas que son tostemps atheu e que viven ath dia de ué dab SMS, era tela, Internet… mes non s’an pas desbrombat eras suas arraditz e que prenen a de bonas de hèr conéisher ath monde de ué quin òm vivèva d’autes còps ena vath de Campan.
Eths vielhs vestits que son arreprodusits dab gran suenh e ath mes près der' autenticitat. Eths esclòps a naseta o de nas de harri, eras sarpas, eras salièras, eths capuchons e’ras capas, eths pantelons de cadís, eras pelhas de droguet e ‘ths capulets arrois qu’an beròia traca quan hèn eth passacarrèra peras vilas de França, d'Euròpa o deth Monde.
Quan paréishen sus eth empont Eras Pastorèlas captivan eths espectators dab un encadenament de danças drilhantas e leugèras. A d'autes moments, que perpausan ua mustra dera vita deths paisans dera vath de Campan aths sègles passats. Cantas e danças emberòian velhadas, pela-pòrcs, bargatòris, noças, henhadas e seguèras.
S’avetz enveja de véger eths espectacles deras Pastorèlas que podetz vier entà Campan pendent eths meses d’estiu o autament que guerdatz sus eth Siti on se produïsen eras Pastorèlas e que i veiratz tanben videòs on dançan ens hestaus internacionaus.